1Ch 15 | NdeIBE | STEP | Ngemva kokuba uDavida esakhile ezakhe izindlu eMzini kaDavida, wakha indawo yebhokisi lesivumelwano sikaNkulunkulu, walimisela ithente kuleyondawo.

1 Chronicles 15

Ukulethwa Kwebhokisi Lesivumelwano EJerusalema

1 Ngemva kokuba uDavida esakhile ezakhe izindlu eMzini kaDavida, wakha indawo yebhokisi lesivumelwano sikaNkulunkulu, walimisela ithente kuleyondawo.

2 UDavida wasesithi: “Kakho ozathwala ibhokisi lesivumelwano sikaNkulunkulu ngaphandle kwabaLevi ngoba uJehova wabakhethela ukuthwala ibhokisi lesivumelwano sikaJehova lokumkhonza kuze kube nininini.”

3 UDavida wasehlanganisa bonke abako-Israyeli eJerusalema ukuze balethe ibhokisi lesivumelwano sikaJehova endaweni ayeyilungisele lona. 4 Wahlanganisa abosendo luka-Aroni labaLevi ngezindlu zabo:

5 Kwabendlu kaKhohathi, kungu-Uriyeli umkhokheli lezihlobo ezilikhulu lamatshumi amabili;

6 kwabendlu kaMerari, kungu-Asaya umkhokheli lezihlobo ezingamakhulu amabili lamatshumi amabili;

7 kwabendlu kaGeshoni, kunguJoweli umkhokheli lezihlobo ezilikhulu labantu abangamatshumi amathathu;

8 kwabendlu ka-Elizafani, kunguShemayiya umkhokheli lezihlobo ezingamakhulu amabili;

9 kwabendlu kaHebhroni, kungu-Eliyeli umkhokheli lezihlobo ezingamatshumi afica mibili;

10 kwabendlu ka-Uziyeli, kungu-Aminadabi umkhokheli lezihlobo ezilikhulu labantu abalitshumi lababili.

11 UDavida wasenxusa abaphristi uZadoki lo-Abhiyatha kanye lo-Uriyeli, lo-Asaya, loJoweli, loShemayiya, lo-Eliyeli lo-Abhinadabi abaLevi.

12 Wasesithi kubo, “Lina liyizinhloko zezindlu zabaLevi, zihlambululeni lina kanye lezihlobo zenu ukuze liyethatha ibhokisi lesivumelwano sikaJehova, uNkulunkulu ka-Israyeli, lililethe endaweni engiyilungisele lona.

13 UJehova wasithukuthelela ngenxa yokuthi lina abaLevi, ayisini elathwala ibhokisi lesivumelwano sikaJehova kuqala. Asizanga sibuze kuJehova ukuthi kwakumele senzeni njengokulaya kwakhe.” 14 Ngakho abaphristi labaLevi bazihlambulula ukuze bathwale ibhokisi lesivumelwano sikaJehova, uNkulunkulu ka-Israyeli. 15 Yikho abaLevi bathwala ibhokisi lesivumelwano sikaJehova ngezibambo zezigodo emahlombe abo, njengokulaya kukaMosi kulandelwa ilizwi likaJehova.

16 UDavida watshela abakhokheli babaLevi ukuthi bakhethe abafowabo ukuthi babe ngabahlabeleli ukuze bahlabelele izingoma ezimnandi, betshaya amachacho lezigubhu lemihubhe.

17 AbaLevi bakhetha uHamani indodana kaJoweli; kubafowabo, u-Asafi indodana kaBherekhiya; lakubafowabo amaMerari, u-Ethani indodana kaKhushaya; 18 kanye labafowabo ngokulandelana ngezikhundla: u-Zekhariya, loJahaziyeli, loShemiramothi, loJehiyeli, lo-Uni, lo-Eliyabi, loBhenayiya, loMahaseya, loMathithiya, lo-Elifelehu, loMikhineya, lo-Obhedi-Edomi kanye loJeyiyeli abalindi bamasango.

19 Abahlabeleli uHemani lo-Asafi kanye lo-Ethani babezatshaya izigubhu zethusi;

20 loZekhariya, lo-Aziyeli, loShemiramothi, loJehiyeli, lo-Uni, lo-Eliyabi, loMahaseya kanye lo-Bhenayiya babezatshaya imihubhe,

21 loMathithiya, lo-Elifelehu, loMikhineya, lo-Obhedi-Edomi, loJehiyeli kanye lo-Azaziya babezatshaya imiqangala, njengokuqondiswa kwabo, 22 uKhenaniya umkhokheli kubaLevi wayengumhlabelisi; wayephethe lapha ngoba wayeligabazi.

23 UBherekhiya lo-Elikhana babengabalindi bamasango ebhokisi lesivumelwano,

24 loShebhaniya, loJoshafathi loNethaneli, lo-Amasayi, loZekhariya, loBhenayiya kanye lo-Eliyazeri bengabaphristi bokuvuthela icilongo phambi kwebhokisi lesivumelwano sikaNkulunkulu. U-Obhedi-Edomi loJehiya labo babengabalindi beminyango yebhokisi lesivumelwano.

25 Ngakho uDavida labadala bako-Israyeli labalawuli bamaxuku enkulungwane bahamba ukuyathatha ibhokisi lesivumelwano sikaJehova endlini ka-Obhedi-Edomi, bahamba ngokujabula. 26 Ngoba uNkulunkulu wayebasizile aba-Levi ababethwele ibhokisi lesivumelwano sikaJehova, benza umhlatshelo wezinkunzi eziyisikhombisa lezinqama eziyisikhombisa. 27 UDavida labo bonke abaLevi ababethwele ibhokisi lesivumelwano sikaJehova labahlabeleli loKhenaniya umkhokheli wabahlabeleli babegqoke izigqoko zelembu lelineni elihle, uDavida wayegqoke lesigqoko semahlombe selineni elihle.

28 Ngakho abako-Israyeli ngobunengi babo baletha ibhokisi lesivumelwano sikaJehova ngomdumo omkhulu, bevuthela izimpondo zezinqama betshaya lamacilongo, lezigubhu lamachacho lemihubhe.

29 Ekungeneni kwebhokisi lesivumelwano sikaJehova eMzini kaDavida, uMikhali indodakazi kaSawuli wayebukele elunguze ngewindi. Wathi ebona inkosi uDavida izithokozisa igida, wayeyisa ngenhliziyo yakhe.